政壇：泛民變臉 財會鬥一番

不過，當陳健波揸正嚟做，將長毛同大舊等人提出嘅一千一百多項拉布式動議，「剪」剩得最多百多項後，拉布議員就立即「變臉」，揚言要同陳健波「全面開戰」，仲「偷步」喺尋日嘅立法會大會拉布。

大舊揚言十倍奉還

長毛、大舊、「慢必」陳志全同黃毓民等四名議員就創科局撥款申請提出咗一千一百多項臨時動議，陳健波尋日作出裁決，只批准當中十九項，仲要求佢哋將臨時動議整合為一百三十三項，惹起幾位拉布議員強烈反彈。但陳健波話根據法庭判決佢有權咁做，又話的確可以畀拉布議員繼續拖延，但咁樣唔係負責任主席所為。

長毛狠斥陳健波做法極之邪惡，係立法會嘅恥辱，又話之前立法會主席曾鈺成、財委會前主席吳亮星、張宇人剪布都講吓理據，陳健波等同摑咗佢哋一巴。大舊亦鬧爆陳健波荒謬絕倫、粗暴濫權，仲揚言會十倍奉還，以後任何議程都會拉長十倍時間審議。

喺尋日大會剩番一項已經講咗一半嘅「一帶一路」動議同一項食水安全動議，原本估計只須三、四個鐘，即大約中午時分就完會。但由於幾位拉布議員不停要求響鐘點算法定人數，長毛臨尾更提出中止待續議案，最後拖拖拉拉搞到接近晚上八時先結束，估計佢哋會再喺今日財委會玩嘢，創科局撥款最樂觀都要押後多一個星期先過到。

不過，同之前嗰幾次拉布戰唔同，今次只得幾位拉布議員搞事，其他泛民議員暫時未有跟隨，可能唔想因而失票，相信唔會玩得好耐。