傳說中有一種鳥叫寒號鳥，羽毛好靚，可惜唔識飛，成日自我吹噓。當其他鳥類忙於築巢過冬，佢哋依然游手好閒，洋洋自得，結果一到冬天，寒號鳥身上嘅羽毛全部脫落，夜晚只能夠瑟縮石隙打冷震，但當太陽出來時，佢哋又忘記夜晚嘅寒冷，一味高唱：得過且過！得過且過！

你話嘞，港府高官似唔似寒號鳥吖？佢哋自我陶醉，自吹自擂，咪就係得過且過嘅最佳示範囉。

係咁嘅，世界銀行最新營商環境報告顯示，香港排名繼續下跌，由去年第三名跌至第五名，唔止被蟬聯第一嘅新加坡愈拋愈遠，仲被南韓爬頭添。排名連年下跌，證明香港營商環境持續惡化，點知港府毫無危機感，反而死撐如果按照舊計分方法，香港排名同去年一樣喎；仲話今年得分高過去年，顯示本港整體營商環境有所改善。

呢啲咪叫自欺欺人囉。本港營商環境每況愈下，係人所共知嘅事實，港府一味扮鴕鳥，除咗證明佢哋不思進取，更加反映佢哋窩囊無能。好簡單，香港前年排第二名，舊年跌落第三名，唔通又關計分制事？同一個排名榜，新加坡連續十年排名第一，南韓亦節節上升，唯獨香港一跌再跌，連三甲位置都保唔住，難為港府仲好意思認叻，簡直唔知個醜字點寫。

其實，唔使世銀發表報告，大家都知道本港營商環境落後於人喇。就講公司註冊、跨境貿易、資產登記制等便利度等，香港都遠遠追唔上新加坡，投資者被迫付出大量嘅額外時間同費用。正如世銀話齋，效率與營商環境密不可分，偏偏港府施政效率低下，做乜都拖拖拉拉，尤其係基建工程，幾乎無一不延誤，無一不超支，加上經濟結構單調、營商成本上升、政治環境惡化等因素，競爭力每況愈下，營商環境又點可能唔跌吖。

最匪夷所思嘅係，港府好做唔做，唔止冇諗辦法改善營商環境，反而添煩添亂。好似舊年推出新《公司條例》咁，增加大量繁文褥節，令商戶綁手綁腳，簡直就係嚴重擾民。港產官僚倒行逆施，香港想有運行都幾難。

根據傳說，寒號鳥最後嘅下場係難抵嚴冬而活活凍死。咪話太一叮唔提醒港產官僚，如果繼續自我陶醉，胡混度日，遲早步寒號鳥後塵，齊齊玩完嘅咋，叮！