城中鏡：水墨結緣

唐偉章又話雖然理大一向偏重理工科目，但已經成立咗文化推廣委員會，每年都引入文化藝術節目。舊年更邀請到嶺藝會會長、嶺南畫派大師趙少昂嘅女入室弟子趙伍月柳擔任駐校藝術家，教授師生水墨畫，更於校內開設畫展添！

見到理大努力注入文化元素，中文大學副校長霍泰輝亦指中大無落後，皆因中大同趙太有更深厚淵源！霍泰輝透露，趙太兒子趙偉仁係中大外科教授，而且又對水墨畫有認識，所以中大校園內掛咗唔少佢哋母子嘅作品。

許曉暉撐復興毛筆字

霍泰輝唔係得把口o架，其實佢寫毛筆甚有功架，但佢話從無學過寫大字，只係靠讀書時寫毛筆同練習簿操返嚟。佢仲大嘆現今學生依賴電腦，加上學校又少訓練，學生變得唔識寫字，佢仲激動話應該要培育下一代中國文化藝術，例如要背範文。

民政事務局副局長許曉暉同樣寫得一手好字，佢都認同要復興毛筆字，因為字等如人嘅衣冠。此外，佢對攝影同陶瓷都好有興趣，更會以素描當禮物。不過，唔好以為多興趣就會一屋都係作品，佢竟然連為大女畫嘅素描都無留起，皆因佢話囡囡成長，樣貌會改變，仲相信自己下一幅作品會更好喎。