特首近日就《施政報告》諮詢政黨意見,泛民政黨好似工黨、白鴿黨同其他議員都表明會出席。唯一杯葛會面嘅公文袋,其黨魁「袋巾傑」梁家傑就批評特首「有佢講無人講,成日以為人哋錯」,會面係浪費時間,仲豪言要孤立特首。不過,一班泛民盟友似乎並不同意袋巾傑嘅做法。

工黨李卓人話知道公文袋有杯葛行動,但工黨要就「全民退保」、「取消強積金對沖」向特首追數,所以會出席會面。民協馮檢基就話會面有條件,只要特首唔安排佢同建制派一齊會面,佢都會出席。按現時形勢,泛民盟友玩理性唔支持袋巾傑,今次公文袋豈不是變成孤島?

小學雞退出WhatsApp群組

另外,建制派今年盡攬立法會內務委員會及財務委員會嘅正副主席位,令泛民議員喺議會完全失勢,但泛民始終佔立法會四成議席,建制都需要與泛民溝通。據聞內委會主席梁君彥同財委會主席陳健波為此開咗一個WhatsApp群組,還邀請泛民四大陣營嘅代表加入。據聞袋巾傑、白鴿黨劉慧卿、工黨何秀蘭同會計界梁繼昌都加入咗有關群組。

但泛民議員政治潔癖嚴重,擔心溝通等於同建制派「同一夥」,最後卿姐、袋巾傑、梁繼昌一加入就即刻退出群組,只剩低何秀蘭,認真小學雞!據聞何秀蘭唔退出群組並唔代表佢冇困惑,而係因為佢係泛民會議召集人,負責泛民協調工作,任何事都要靠佢通知,所以「焗住」留喺群組。

泛民經常將「擁抱溝通」掛在嘴邊,但公文袋唔單止「講一套、做一套」,仲搞到好似玩自閉咁,點搞呀?

第一手消息請下載on.cc東網iPhone/iPad/Android/Windows Phone Apps