政壇：砌廢柴機械人 翁世權浴火重生
啱啱離任渣打嘅Simon翁世權放緊一個悠長假期，趁機會享受人生，先養精蓄銳再重戰江湖。佢仲報咗名參加「香港廢柴機械人大戰」，落手落腳同囝囝Trevor一齊砌一個「打不死」嘅機械人。
砌個「打不死」嘅機械人，對翁世權同囝囝Trevor絕對無難度。（互聯網圖片）
「廢柴機械人大戰」源自日本，玩法係大家砌啲機械人出嚟對撞，唔理「頹撼」起嚟幾冇造型，最後唔散「打不死」嗰個就贏。舉辦單位開宗明義叫「廢柴機械人」，仲話明理念係「享受失敗」同「享受無法順利運作的狀況」，即勇於接受挑戰。會唔會反映住Simon「鳳凰涅槃、浴火重生」心態呢？
Simon就話見香港Maker Faire舉辦咗呢個大戰，覺得好得意，所以就同六歲嘅囝囝參賽。活動最啱一啲無高技術嘅人士參加，只要砌到一個「打不死」嘅機械人，擊倒所有敵對機械人就能夠勝出。Simon暫時未開始郁手砌機械人，仲構思緊，但大方向係要夠堅硬，防撞能力高，希望撞極都唔爛。
