政壇：冷氣滴水樹根出街着雨褸

有立法會議員好關注冷氣機滴水所產生嘅滋擾問題，仲喺大會上提出質詢，議員鍾樹根指出街都要擔遮同着雨褸，佢話夏天喺灣仔、銅鑼灣嘅巴士站等車時會好容易被冷氣機滴水搞到一身濕。

何俊賢

高佬賢話引發社會問題

之後漁農界「高佬賢」何俊賢又發表偉論，指冷氣機滴水除咗滴濕頭同弄污衣服外，仲會影響睡眠質素。原來佢指滴水會滴到下一層嘅機頂，產生噪音污染，市民會因此而影響睡眠質素，仲會產生社會問題。

佢哋仲希望食物及衞生局局長高永文有更多方法解決滴水問題。但高永文就話好難搵到滴水源頭，要解決就需要更多人手。

冷氣機滴水被議員講到會衍生社會問題，皆因過去十年平均每年收到大約一萬五千宗冷氣機滴水投訴，但只有二百九十位衞生督察去處理，導致過去十年只係發出五千多封警告信，最後只得十二宗檢控個案，少得可憐。