政壇：建制派夢遊工務組
話說泛民主派喺上個立法年度成功突襲取得立法會工務小組委員會控制權，建制派部分議員事後想追補加入委員會，泛民更加百般刁難。經此甩轆一役，建制派今年度就大反擊重奪工務小組。不過，工務小組尋日舉行本年度首次會議，其中建仔嘅「雙料議員」Ben陳恒鑌同工聯會議員「阿王」王國興就好似發緊夢咁，唔係以為工務工程項目被抽走，就係無視議程內容，要政府官員同工務小組主席盧偉國「溫馨提示」，認真瘀爆！
政府向工務小組提交二○一五至一六年度立法會會期審議嘅項目文件，涉及七十二項政府工務工程，當中十一項係喺上年度已提交嘅，但未經表決或討論。本身係荃灣區議員嘅阿Ben就喺會上發問，佢發現有十八區區議會一億元嘅社區重點項目工程無咗，例如荃灣區嘅重建西樓角花園項目，又話區議會已同意有關項目工程，唔應該因為社會上幾個反對派就令工程項目無咗喎。
重建項目七月已通過
其實阿Ben所講嘅重建西樓角花園項目早喺今年七月已喺工務小組通過。民政事務總署助理署長黃海韻只好如實交代，話有關撥款申請現正排隊提交上財務委員會等候審批。
至於阿王就似乎無認真「聽書」，佢喺會上狠斥泛民舊年「拉布」，令十一個工程項目被「拉倒」，之後就問當局可唔可以優先處理嗰十一項工程。聽到阿王咁問，盧偉國就重申，佢喺會議開始時已講明其中四份文件就係上年度未及討論嘅議程，尋日開會「正正就是想追番（進度）。」
