中環：大車斜路違泊 恐溜後傷人
「條路本身就已經好斜，仲要泊啲吊臂車喺度，呢頭行人路又咁窄，好多時要行出馬路，陣間啲車一溜後咪搞出人命？」
有市民指中環士丹頓街不時有車輛違泊。
中環居民余先生指出，介乎奧卑利街及鴨巴甸街之間的一段士丹頓街，不時有車輛違例停泊，當中更加不乏重型車輛，擔心因為地勢陡峭，或會釀成意外，「好耐之前西營盤嗰邊都有類似意外，希望唔好喺呢度再發生一次。」
警方發言人證實，於過去一年共接獲四百八十一宗有關涉事路段交通違例的投訴，期間發出三千零六十五張定額罰款告票。發言人續指，會繼續留意有關情況，並於適當時候採取針對性執法行動。
余先生認為事件涉及市民生命安全，惟現時問題仍無改善迹象，促請警方日後多加巡查，對違例司機嚴加檢控，以收打擊之效，「違泊通常一係貪方便，一係就為咗慳泊車錢，只要車主付出代價，佢哋就自自然然唔會再泊喺度。」
