曾幾何時，香港郵政服務受到唔少人讚賞，甚至有首兒歌《郵差叔叔》歌頌綠衣天使任勞任怨添。可惜今時唔同往日，郵政官僚經營不善，不思進取，加上管理混亂，醜聞多多，任勞任怨變成人見人怨，講起真係羞家。

即係咁，香港郵政生財無方，連年虧損，連審計署都睇唔過眼，曾發表報告炮轟，點知郵政官僚一於少理，既冇改善服務，又冇諗辦法增加收入，淨係識得算死草，以關閉部分郵局及縮短服務時間來「節省開支」，犧牲市民利益，引起怨聲載道。

錢照收，價照加，而服務質素就每況愈下，市民梗係唔收貨啦。喺全城鬧爆之下，香港郵政終於跪低，聲稱正研究喺不增加額外成本下，考慮延長部分郵局嘅服務時間喎。嗱，呢啲咪叫今日嘅我打倒昨日嘅我，唔衰攞嚟衰囉。

民生無小事，香港郵政話就話以營運基金形式運作，自負盈虧啫，但始終都係公營機構，而且郵政服務涉及民生，點可以隨便縮短服務時間o架。正常嚟講，業績欠佳更應該加強服務，吸引客流，而唔係諗縮數，以「縮局」及「減時」趕客，郵政官僚本末倒置，唔怪得愈做愈縮喇。

老實講，雖然近年環境有變，競爭激烈，但郵政服務唔係冇得做。家陣網上購物大行其道，私營快遞公司成行成市，生意愈做愈大，香港郵政佔盡天時地利人和，本來大有可為，完全可以同競爭對手爭一日長短。可惜吖，香港郵政話就話對開拓新業務嘅建議持開放態度，實際上一直故步自封，加上官僚體制積弊難返，得過且過，根本冇考慮改善經營。最離譜嘅係，香港郵政管理混亂，淨係員工集體蛇王兼呃OT嘅醜聞就屢見不鮮，業績點可能唔見紅吖，如果係私人企業早就關門大吉添。

有立法會議員批評郵政服務制度僵化，完全唔識得變通，可以講係一語中的。新加坡郵政十幾年前開始實施一系列企業重組措施，成功由一家只為新加坡人提供服務嘅郵政營運商轉型為區域電子商務物流企業，做得有聲有色，都唔知幾成功。反觀香港郵政墨守成規，一味食老本，簡直係愈窮愈見鬼。

講到底，香港郵政管理爛到入心，睇嚟都無藥可救咯，當局與其將舊郵筒嘅皇家徽號「去殖民化」，不如先對香港郵政「去官僚化」好過喇，叮！