好多大機構都會有公關幫手做宣傳，出事嘅時候又會幫手拆彈，同時要懂得點樣同人溝通。香港公共關係專業人員協會早前舉辦咗個研討會，曾經做過九巴公關部主管嘅「九巴金公主」伍穎梅（Winnie）就話，公關人際關係方面嘅經驗，對於佢日後感情生活有好大幫助，唔知佢係咪講緊自己嘅戀情呢？

許鎮德認為處事要有同理心，顧及大家感受。

新聞處處長聶德權（左）讚前處長陳祖澤（右）係公關大師傅，教識佢好多嘢。

伍穎梅（左）與恒隆地產董事總經理陳南祿（右）嘅公關手腕同樣了得。

Winnie話，佢當年做公關部要接收好多投訴，唔啱客人嘅心水，對方就會鬧佢，咩難聽嘅說話都聽過，當年都覺得好難受，但後來就覺得呢啲經驗好受用，因為識得聆聽客人嘅需要，向客人提供優質服務。

四點鐘許Sir：要有同理心

早年曾出任政府新聞處處長嘅馬會前主席陳祖澤（John）認為，好嘅公關可以幫你解決問題，唔好嘅就會造成災難，導致公司最高層被炒魷魚、公司名聲受損，甚至倒閉。佢話依家每個崗位都要熟悉公關技巧，而傳媒都希望搵到公司嘅最高負責人，所以最高負責人更加要識公關技巧。

至於「四點鐘許Sir」警察公共關係科總警司許鎮德，工作性質同公關好相似，佢都分享工作心得，話如果處事有同理心，就唔會發生任何事，如果顧及大家感受，點會有事發生呢？佔領行動過後，依家警民關係冇咁好，咁啱警方早前開咗個Facebook做宣傳，唔知許Sir有冇撒手鐧呢？

第一手消息請下載on.cc東網iPhone/iPad/Android/Windows Phone Apps