政壇：港樂玩盡西九「自由約」
音樂人及市民帶大型樂器搭港鐵鬧出軒然大波後，尋日港鐵卒之宣布解決辦法，估計好多音樂人及市民都會安心啲。講開音樂，嚟緊嘅下周日（十一月八日），大批音樂人將會現身西九苗圃，市民可以喺維港邊欣賞到優美嘅交響樂。
香港管弦樂團應西九管理局嘅邀請，為第四輪西九「自由約」擔任表演嘉賓，佢哋準備嘅表演都幾豐富，既有銅管樂組嘅八重奏，又有港人耳熟能詳嘅《仙樂飄飄處處聞》，亦有舒伯特及柴可夫斯基等嘅妙樂。交響樂團走出傳統嘅寧靜演奏廳，喺大自然環境下表演，呢啲安排外國不時可見，但香港就比較少，今次嘅活動估計可以吸引唔少愛好音樂嘅市民去見識吓，齊齊喺藍天白雲下重溫經典妙韻。
