政壇：搞搞政：創科局千「布」纏身 陳健波磨定利剪

逐條處理拖到聖誕

尋日中午係議員提交有關撥款嘅臨時動議時限，陳健波話，秘書處已經收到議員就創科局撥款申請提出的一千一百三十三條臨時動議，獨立議員黃毓民提咗七百條，其次係社民連梁國雄提咗二百四十七條；人民力量議員陳偉業及陳志全就分別提出一百條及約七十條；議員張超雄及梁家傑亦各自提出八條及一條。如處理每項臨時動議用一分半鐘計，最少要二十八個小時，但陳健波講明唔希望拖到聖誕節，市民亦唔願見，所以佢會喺呢兩日裁決議員提出臨時動議是否與撥款申請有直接關係，亦會與幾位提出臨時動議嘅議員商討將臨時動議整合。

陳健波認為，今次創科局撥款申請唔係最難嘅事，估計高鐵超支撥款申請及港珠澳大橋嘅撥款申請會更加困難，希望財委會唔好再次淪為搞政治爭議嘅地方。