政壇：醫管局變大白象 蘇利民遺蘇州屎

倡成立委員會檢討系統

周伯展認為，今次加薪只係平息咗表面問題，治標唔治本，事緣六年前經濟唔好，醫管局僱員跟隨公務員減薪，從此好多人都產生咗誤解，以為醫管局同公務員嘅薪酬掛鈎。不過呢點明顯有問題，按佢理解，醫生角色應該類似外判，薪酬待遇應該好過公務員。

周伯展話，醫管局嘅角色應該要做好公立醫院統籌及管理，可惜該局並無發揮作用，反而變咗大白象，就好似今次醫管局動用儲備解決加薪一事，使用到額外資源，亦令剩餘嘅儲備未必足以應付日後所需，屆時可能影響市民及打擊員工士氣。對於今時今日醫管局嘅問題，佢認為該局前行政總裁蘇利民應該為醫管局行政混亂問題負責。講完上述問題後，佢提議當局應該成立一個由業界及非業界組成嘅委員會，檢討整個醫管局系統，完成呢項檢討後，個委員會就可以解散。

講完醫管局後，近日有法官批評醫委會處理投訴機制問題多多，事件亦引起各界討論，唔知周伯展對醫委會應否有類似檢討有乜睇法呢？本身係醫委會委員嘅周伯展就避重就輕話，醫委會本身已經有一班專業醫生監察喎。