喺內地，扶倒地老人家隨時被敲詐，以致有公司乘勢推出「扶老人險」。估唔到香港仲誇張，做好人，分分鐘監都有得坐，問你怕未！

係咁嘅，一名男途人見路邊有部客貨車冇閂門，諗住好心幫吓手，點知車主返到後發現手機失竊，懷疑係嗰名男途人所為，於是報警求助，結果一無所獲。本來一場誤會，無乜大不了，點知律政司堅持以「干預汽車罪」控告該名男途人，仲令對方入獄六星期添。佢出獄後提出終審上訴，終審法院尋日裁決，指法例所指嘅「干預」係指干擾或亂動車輛某部分並造成破壞，上訴人當時行為唔構成相關罪行，因此判佢得直。

咁都得？律政司有咁多精英，犯咁低級嘅錯誤已經難以接受，家陣仲羅織罪名，擺明砌生豬肉，上演秦檜屈岳飛「莫須有」嘅現代版，仲有冇再離譜啲呀！話時話，小市民最終沉冤得雪，都算還得神落咯。正如法官話齋，部分被告喺原審時冇法律代表，以致未能喺原審時提出對案件有關鍵影響嘅法律觀點，好似上訴人咁，都係好彩有律師義助提出終審上訴，至可以脫罪咋。

冇計喇，「鬼叫你窮呀，頂硬上。」的士司機「濫收」五毫車資、隧道收費員「盜竊」一蚊，通通都要洗乾淨八月十五，呢啲咪「竊鈎者誅，竊國者侯」囉，依家連冇罪都硬砌到有罪，唔怪得有人話「法律面前，窮人含恨」喇。

不過咁，法律面前，窮人就含恨啫，有錢有勢有外部勢力照住嘅就唔同講法嘞。佔領之亂幾乎搞死香港咁滯，而搞手亦直認違法，但佢哋至今仍然逍遙法外，風流快活，特別係壹淫媒老闆淫賤黎嘅黑金醜聞，查到依家都未有下文，當局到底有咩不可告人嘅苦衷？

講起淫媒，佢哋反中亂港始終如「壹」，淨係觸犯《淫褻及不雅物品管制條例》而被判罪成嘅個案已達到一百三十幾宗，幾乎厚過電話簿咁滯，但每次都係輕輕罰款了事，連搲痕都嫌無力。最離譜嘅係，壹淫媒早排被判藐視法庭罪成，連法官都話罪行嚴重，點知最終罰款了事，律政司居然放棄上訴。港府投鼠忌器，話唔係怕咗背後嘅外部勢力，三歲細路都唔信喇！

諗諗吓，香港嘅法治就好似《動物農莊》咁，有啲動物比其他動物更平等，仲好意思自吹「法治之都」，唔驚笑大人個口嘅咩，叮！