城中鏡：廠商好煮得
近期零售市道不景，部分旺區店舖租金開始下跌，尋日喺活動上見到米芝蓮食肆「阿鴻小吃」創辦人黎偉鴻，講起舊年佢間北角店舖因捱唔住貴租而結業，佢話現時租金似略有下調，假如請到人嘅話，唔排除北角店會捲土重來。
杜煥（右）教戴澤良以麥芽糖拉出孫悟空造型糖公仔（小圖）。
李秀恒（右）喺黎偉鴻教路下，煮出香噴噴嘅南乳粗齋。
崔家權希望活動有助刺激年尾銷情。
香港中華廠商聯合會本周六起喺葵涌運動場舉行「第四屆香港食品嘉年華」，期間每日會有唔同名廚同師傅一展手藝。尋日會長Eddy李秀恒率先拍住黎偉鴻即場示範煮南乳粗齋，副會長戴澤良就跟傳統拉糖師傅杜煥學整拉糖公仔，兩位都有板有眼，睇落唔錯咁喎。
講起市道，黎偉鴻話好多舊客都由北角跟到現時觀塘舖，但都預咗流失唔少街坊客。依家想喺北角開番店唔算難，但請人先係問題，因後生師傅多數做西餐或日本餐，滷水師傅難尋，所以佢最近研究緊轉做咖喱等其他類型食肆。至於做咗拉糖師傅六年嘅杜煥亦喺嘉年華大展身手，本身係設計師嘅佢唔忍心呢門傳統手藝消失，於是多番鑽研，屆時市民有機一睹呢種懷舊玩意。
推一蚊湯包吸客
講番個嘉年華，南北行聯營業務發展經理崔家權話近兩個月公司營業額下跌一成，所以會喺活動推出一元養生湯包吸客。戴澤良預計，活動每日可吸引約二至三萬人進場，較上屆增約百分之五至十。對於近期內地訪港旅客數字下降，Eddy認為港元匯價相對高，故令購物天堂吸引力減，冀舉辦大型活動有助改善喎。
