講Apple已故教主嗰套新戲《時代教主：喬布斯》上咗畫，有元祖級Apple人話套戲老作。邊啲元祖級？咪就係創辦人之一嘅沃茲尼亞克，同埋當年Macintosh Team嘅軟件設計師Andy Hertzfeld。
佢哋都話套戲入面有啲場面係作出嚟，根本無發生過，有啲說話根本無咁講過。嗱！不過佢哋又話唔逼真都唔緊要，事關戲係用嚟娛樂觀眾咁話。
劇入面講到，喬布斯每款新產品發布前都同嗰六個人爭拗四十分鐘，編劇Aaron Sorkin自己都認呢段係老作，只係想帶出喬布斯同人衝突呢樣嘢咁話，阿編劇仲話呢套唔係紀錄片，叫大家當「畫」咁睇，唔好當「相」嚟睇。
話時話，阿教主夫人（講緊嘅當然係喬布斯太太）之前都出過手想阻套戲出世，夫人親自打畀里奧勒度狄卡比奧同基斯頓比爾，叫佢哋唔好演，最後先由米高法斯賓達接手。
咁套戲依家收唔收得？美加上映兩周，票房只係大概二千一百多萬港元。你都好想睇？等出年啦，真o架，出年一月中香港先上呀！
第一手消息請下載on.cc東網
