林家亨
簡單一張開幕請柬，入面載滿咗華資證券行嘅人情味。「峰哥（張華峰）器量非常之大，佢都支持我創業，峰哥第日有嘢要幫手，我第一個企出嚟！」Simon林家亨將喺做咗十四年嘅舊舖恒豐證券，跳槽去新老闆Matthew楊永仁新開嘅恒發金融做董事總經理。難得嘅係，身為恒豐老闆嘅立法會金融服務界議員「肥老闆」張華峰仲會現身剪綵，林家亨話好感動。
林家亨過檔楊永仁間新舖，舊老闆張華峰（圖）一句「再見亦是朋友」兼去埋剪綵，呢啲就係華資行嘅人情味。
肥老闆話一定到：「我全身投入立法會議員工作，恒豐現有業務由兩個細佬睇住，都希望後生仔（指林家亨）出去發展」，仲話大家「永遠都係朋友！」完全冇話同行如敵國。Matthew就話佢隻恒發洋參舊年上市時先認識Simon，傾咗一排好投契就撬佢過檔，將會叫佢幫手搞散戶生意同申請九號牌（資產管理牌照）。佢又話Simon係股評人，好多人識，未來會繼續畀Simon亮相各大傳媒，唔會叫佢封咪，等佢做恒發「生招牌」。
Simon話今次過檔「乜都要做」，係難得嘅發展機會，由過去做研究部進身前線，楊老闆Matthew都好識做，預咗啲Option畀Simon做股東，而且新公司都有親切感，事關同舊舖都有個「恒」字。
第一手消息請下載on.cc東網
