政壇：立會飯堂招標職員不問政治

近年立法會拉布頻頻，大會、財委會以至事務委員會都開多咗好多會，一班議員成日要喺大樓打躉，可以醫肚嘅立會餐廳變得好重要。自從立會新大樓入伙以來，餐廳招標一波三折，依家呢間承辦商都算做得唔錯，但話咁快合約將喺明年七月底到期，今年十一月又要再招標。

立會餐廳對上一次招標係新大樓入伙，初時冇餐廳肯投標，又因為受到政總爆發退伍軍人症牽連，搞到開咗大會三個月後餐廳先至開幕。由於金鐘附近想搵二、三十蚊食餐飯嘅食肆已經係鳳毛麟角，加上餐廳食物水準都算唔錯，所以生意都幾好，午市仲經常爆滿，連對面政總官員都被吸引過來幫襯添!

據悉，立會行管會將委任評審委員會負責招標，委員包括議員、議員助理、秘書處職員同記者。唔知呢間餐廳老細會唔會繼續投標呢？職員就話，佢哋只係做飲食，唔理政治喎。