標準工時委員會（標委會）運作至今兩年半，最遲明年三月要向政府交報告，但喺討論嘅關鍵時刻，爆出六名勞方委員考慮「集體跳船」，底因係不滿官方推動標準工時立法不力。
但咪以為勞工界火滾，工商界就可受惠，據聞有工商界中人大吐苦水，呢位就係標委會資方代表之一、工業總會前會長Stanley劉展灝，因佢反對標時立場太鮮明被投訴，最近仲發生有人踩上佢旗下公司示威嘅事件添！
斥示威如恫嚇噤聲
Stanley話最近聽聞有勞方委員投訴自己，佢估計同喺標委會太多出聲，涉及太多相關嘅經濟情況同數據，加上接受傳媒訪問時亦有發表個人意見有關。佢坦承畀人投訴都冇計，事關佢講明代表商會唔贊成標時立法，唔可以因為有人投訴就唔講，強調勞資雙方都可以喺標委會中講道理，而佢所講嘅數據都嚟自官方報告，勞方都反駁唔到佢嘅理據。
不過，佢嘅標時立場咁清晰係有代價，原來立法會議員「長毛」梁國雄早前帶同十多人，到其公司示威爭取標時立法，佢知悉後感到好嬲，重申自己係為商會發聲，有乜事應該喺標委會入面傾，唔需要搞佢公司。佢又相信示威者呢個行動係唔想佢就標時講咁多嘢，可能想嚇埋其他資方委員，就算咁，佢表明唔可以向呢啲行為屈服，已就事件報警備案。
其實支持同反對標時立法都可以表達，最緊要係尊重雙方立場，盡量以協商取得共識，但事實擺在眼前，標時傾咗一段時間，勞資雙方仲企硬自身立場，暫未見任何一方嘅口風有鬆動，最終有冇突破性發展，就睇吓有冇雙方都信任嘅有心人居中協調，甚至促成其事嘞！
第一手消息請下載on.cc東網
