太一叮尋日至講過，港產官僚一個二個姓賴，每次爆出旅遊醜聞，唔係第一時間補鑊，而係第一時間交波，嗱，真係冇冤枉佢哋o架！

聽吓商務及經濟發展局局長蘇錦樑點講。佢話喎，內地旅客被迫購物遭毆斃嘅事件，反映業界有少數不良分子喺旅行團安插「影子團友」，相信旅遊業議會同內地有關部門會加強規管，又話港府會喺今年內向立法會提交旅監局條例喎。

蘇局長言下之意，即係業界有責任，內地當局有責任，唯獨港產官僚冇責任，咁唔係A字膊又係乜呀？最離譜嘅係，設立旅監局，由上屆政府講到依家，足足拖咗四年，咪畀人睇死，今屆政府落咗台，旅監局都無法成事吖！

港產官僚敷衍塞責，拖拖拉拉，反而國產官僚手起刀落，即時推出辣招。國家旅遊局尋日發出通知，重申繼續打擊「不合理低價遊」，參與嘅旅客唔單止冇賠償，仲要承擔法律責任，並會受到「處理」；另外又會開通投訴熱線同埋網上投訴平台，舉報者仲會獲得獎勵添。

冇錯嘞，治亂世，用重典。低團費問題愈演愈烈，家陣仲搞出人命，都係時候落重藥嘅嘞。之不過諗深一層，內地兩年前通過《旅遊法》，已經明文禁止低團費以及強迫購物，弊在留低條大尾巴，只要旅客同旅行社簽字安排同意購物行程，就唔算違法。你話嘞，如果唔係內地當局漏招，又點會搞成今日咁吖？

有業界人士就講得啱嘞，旅議會並無實權，只能靠向警方舉報，所謂規管旅行社，根本係管雞仔唔管麻鷹，加上本港對入境旅遊嘅監管過時，唔出事至奇。所以話，要杜絕低團費嘅旅遊亂象，始終要政府出手，呢方面，中港兩地官僚同樣責無旁貸。雖然話低價團問題源頭主要喺內地，但香港成日自詡法治之都，變相禁錮旅客，粗口辱罵甚至打人，點都唔可以接受。不過講就咁講，大家有眼見，由惡導遊阿珍「金句」鬧人到乒乓球國手被辱罵激死，邊次出事後，官僚唔係話加強打擊整治歪風o架，結果風聲一過，又係關人個關，亂象依然，結果咪鑊鑊新鮮鑊鑊甘囉！官僚靠得住，豬乸會上樹，幾時都冇錯嘅。

咪話太一叮唔提醒，家陣旅遊及零售業已經吊緊鹽水，當局繼續坐視亂象，遲早嚇走晒啲旅客，到時香港食自己都似，叮！