城中鏡：男人打呔好辛苦
尋日沙田馬場舉行東方表行沙田錦標及精英碗賽事，東方表行主席楊明標同兒子兼董事總經理Dennis楊衍傑等男士都戴上五顏六色煲呔，襯晒「時尚煲呔日」主題。Dennis話香港男士夏天仲要打呔真係好辛苦。佢平時返工，寧願着商務便裝（Business Casual），打呔可免則免。
楊明標夫婦（左及中）同陳南祿齊齊支持活動。
楊衍傑戴上藍色煲呔到場。旁為楊太Clara。
王嘉恩（右一）、梁青華（右二）、奢華品牌經理許慧莊（右三）同冼雅恩齊歡聚。
對紅色領呔情有獨鍾嘅馬會大董陳南祿都有到場，佢笑稱屋企都有煲呔，但因為唔識打所以好少戴。東方表行董事林慶麟就話比起傳統領呔，其實煲呔既方便又便宜，間唔中戴吓，都幾好玩。據知今年係首屆「時尚煲呔日」，明年將會繼續舉辦下去，希望為男士衣着增添些少玩味。
楊明標嘆鐘錶業陷寒冬
天寶鐘表主席梁青華、香港珠寶玉石廠商會會長冼雅恩同做物流生意嘅香港國術總會會長Albert王嘉恩等人，都有到場支持。講起日前汲水門橋疑遭躉船撞到，事後因封橋令大嶼山成為孤島，Albert話自己公司冇受今次事件影響，因為佢哋嘅業務多數經陸路運輸，而唔係經空運，所以好好彩。
零售市道差，鐘錶業感受最大，業界老行尊楊明標慨嘆，對後市睇唔通透，預計低迷氣氛將延續至明年，甚至後年。佢話有國際品牌因應市場變化，亦轉為生產平價款式，事關貴價錶真係好難賣，業界惟有捱吓寒冬咁話。
