仲記得CY梁振英喺競選一二年特首選舉期間，有開過官方facebook，直至一二年三月二十五日當選特首後就停用，而事隔三年半，CY忽然用真名開帳戶。尋日下午約二時，帳戶名稱為梁振英（CY Leung），頭像圖片為CY企喺禮賓府花圃，身穿「家是香港」白色T恤，但唔係所有人都可以加佢做朋友，多數人只能追蹤佢嘅近況。

CY首個舉動係同民政事務局局長政治助理徐英偉留言講「Hi」，徐英偉回覆「Welcome to Facebook」，徐其後回應政界中人查詢時，更證實呢個帳戶確實屬於CY本人，隨後亦陸續有政府中人成為CY嘅fb朋友，如據稱亦係尋日先開fb嘅教育局局長吳克儉，以及政制及內地事務局副局長陳岳鵬、發展局政治助理馮英倫等人。

設定帳戶 禁網友留言

不過，CY忽然開fb，唔通唔怕畀人鬧爆？其實CY同佢團隊做好晒準備，一早戴晒頭盔同着晒盔甲，去避網民四方八面嘅明箭同暗箭，包括一早設定帳戶唔畀網民留言，只可以讚好（like）同分享貼文，但一批網民都唔係省油嘅燈，有人提出要檢舉封鎖CY嘅fb，因此CY帳戶懷疑受此影響「被消失」，突然無法載入頁面，約一個鐘後先至回復正常。

CY嘅帳戶回復正常後，貼出多張花朵嘅照片，留言話很多朋友經常同佢交換種花照片同心得，尋日開facebook會同大家分享花果樹木同生活照片，希望大家欣賞，但及至晚上八時許，CY帳戶突然又「被消失」。即係半日內至少兩度「被消失」。

有資訊科技界中人分析，帳戶「被消失」有兩個可能，一是用戶不公開有關頁面，另一可能係畀網民檢舉次數太多，究竟邊個先係真相，相信只有當事人至知嘞！

第一手消息請下載on.cc東網iPhone/iPad/Android/Windows Phone Apps