政壇：郭少明減肥 拉老婆落水
尋日喺一個競步活動，見到莎莎國際主席郭少明嘅身形比之前清減咗，原來佢喺呢四年間，足足減咗三十磅咁多。究竟佢有乜妙法？佢話個秘訣就係習慣將每餐嘅食量都減到以前嘅一半，例如以前食一塊牛扒，依家就只會食半塊。
郭少明（右）同新界鄉議局主席劉業強出席慈善活動。
郭少明講起減肥時就話，其實佢依家食嘢，都冇刻意少油少鹽少糖，就算畀舊梅菜扣肉佢，佢都一樣照食，但為咗減磅，佢食嘢時就會食少一半。咁剩低嗰一半食物點處置呢？佢就話：「畀老婆食囉！」咁佢老婆咪要逼住一齊減肥，或者無啦啦額外食多一半？佢笑笑口話：「咁就唔知佢喇！」
佢又憶述，最初減肥時，一開始瘦得好快，三個月就瘦十磅，但之後進度就慢咗落嚟，所以需要持之以恒。佢又話試過買衫時，專登叫店員畀細兩個碼自己，個店員仲以為佢開玩笑，其實係佢好了解自己貪靚嘅性格，買咗靚衫着唔落，就會逼自己減到着到為止喎。
