政壇：腦有良性瘤高永文𥄫實

話說食物及衞生局局長高永文○七年喺雲南出席一個步行籌款活動期間頭痛，返香港先發現原來係腦下垂體中有個良性腫瘤。高永文尋日喺電台重提舊事，自爆當時食咗三粒類固醇，再同自己打針都無效，能醫不自醫，最終要急急撲機票返港。佢又話雖然事隔八年，但原來至今都要每年檢查一次。

之前高永文落區宣傳政改與市民爭執，佢嘅一句「講完」仲成為潮語。高永文講番起件事時就話，做過嘅事無謂再辯護或後悔喇，但因為自己最介意畀人指摘佢呃人，仲要呃細路，希望市民明白佢點解發怒。

高永文又提到，人哋對於高永文呢個人最難忘嘅可能係沙士後，時任醫院管理局主席梁智鴻辭職時，佢流嘅眼淚。但佢自己最深刻嘅，其實係醫管局前行政總裁何兆煒感染沙士入院時，佢同梁智鴻一齊寫電郵向同事公布消息、忍唔住牛衣對泣嘅一幕喎。