政壇：飛魚不復當年勇 鍾國斌老貓燒鬚
立法會紡織及製衣界議員Felix鍾國斌曾被冠以「立法會飛魚」美譽，但佢今年甩底，冇參加維港渡海泳，但尋日就參加咗一個慈善游泳比賽，可惜曾喺呢個比賽中奪冠嘅佢，今次就老貓燒鬚，三甲不入。Felix話因為呢排掛住開會，冇時間練水，只能夠喺比賽前兩日先抽到時間練習，加上其他選手，個個都後生佢一大截，所以都預咗唔夠人哋游喎。
鍾國斌尋日參加慈善游泳比賽，可惜狀態不復當年勇。
Felix前年有參加呢個慈善游泳比賽嘅領袖邀請賽，兼勇奪冠軍殊榮，但今年就三甲不入，似乎狀態一般。佢話因為其他對手太勁，而且個個都三十幾歲，好後生，所以都預咗唔夠人哋游，加上自從立會十月復會之後，都好難抽時間練水︰「日日財委會開到七、八點，惟有比賽前兩日早啲起身抽時間練，所以今年狀態冇咁好。」
佢自言唔會太介懷比賽成績。所謂一分耕耘一分收穫，佢今次臨急抱佛腳，成績唔好，相信都係佢意料中事喇！
