政壇：英廚神港開舖 名人集郵
國際名廚Gordon Ramsay來港開餐廳，尋晚舉行派對，吸引唔少識飲識食嘅名人出席，包括名媛薛芷倫同女兒馬桂珩、邱詠麒、名模馬詩慧同兩個女兒王曼喜及王麗嘉、甄子丹太太汪詩詩同父母及表妹湛琪清亦一齊嚟，仲有藝人莫可欣同徐肇平等等。
馬詩慧（左一）帶埋兩個女，同Gordon Ramsay（左二）合照。
汪詩詩（左）同薛芷倫齊撐場。
現場所見，Gordon Ramsay更成為名人嘅集郵對象，而佢亦來者不拒，甚為友善，薛芷倫隨即喺社交網分享，大讚名廚具魅力，佢話：「他的真人魅力非凡，果真是國際級人物，我喜歡看他的烹飪節目MasterChef，是他的小粉絲，今晚很興奮得到他的私人親筆簽名！」
生於蘇格蘭嘅Gordon Ramsay喺英格蘭埃文河畔斯特拉特福鎮（Stratford-upon-Avon）成長，更曾獲英女王伊利沙伯二世授予大英帝國官佐勳章（OBE），以表揚佢對餐飲業嘅貢獻添！Gordon喺世界各地經營多家出色餐廳，合共取得七顆米芝蓮星。
