政壇：一舊雲淆底 自刪留言

一舊雲首先質疑，周奕希最近加入新嘅議政平台「新思維」，呢個可能係典型退黨保平安，又批評黃逸旭喺二○一二年突然跨區參選立法會九龍西地區直選，事後就無再喺該區，直指當時有傳對方參選，受指使去鎅泛民票，質疑無人挑戰同背後有政治因由有關。

其實只要熟悉地區形勢，就知道周奕希同黃逸旭喺地區打滾多年，其中前者更任葵青區議會主席多年，周奕希接受查詢時亦話，唔想浪費時間去回應是非。

曾連累3000朋友

可能一舊雲亂發炮後都知衰，唔夠半日後就自行刪去批評周黃二人嘅部分，有人笑言或者周黃二人可以套用一舊雲嘅黨友，即白鴿黨主席劉慧卿嘅金句用作反擊，即係「我選舉嗰時你都唔知喺邊度」嘞！

其實，一舊雲喺社交網站「中招」都非首次，好似早前佢一度唔小心打開咗朋友透過社交網站傳送嘅一條連結，就連累接近三千名朋友中招，搞到佢哋都收到相同連結，當時一舊雲已經畀人質疑累街坊，今次又亂發炮惹爭議，睇怕一舊雲下次用社交網站，真係要停一停，諗一諗至好行動嘞！