低價團愈禁愈多 出人命皆因官禍
有人話，內地遊客參加低價團，結果被強迫購物，係周瑜打黃蓋，一個願打，一個願捱。其實，強迫購物事小，搞出人命事大，低價團問題多多，七國咁亂，居然可以長期存在，而且愈做愈旺，真係唔到你唔服。
呢，內地官媒踢爆，雖然香港及內地曾經打擊零團費現象，但最近問題捲土重來，香港、澳門及泰國都係重災區，港澳遊嘅低價團甚至佔市場八成以上。官媒促請業界自律，摒棄安排「影子團友」強迫購物嘅經營陋習，並提醒遊客千萬唔好貪圖低價，參加低於成本嘅旅遊團。
講到呢度，大家應該知道點解低價團禁之不絕喇，咪就係因為業界唔自律，加上官僚敷衍塞責囉。早年爆出惡導遊辱罵遊客等連串醜聞，兩地當局實牙實齒話要打擊零團費，香港旅議會推出一團一導遊等十大措施，內地亦實施《旅遊法》，點知得個睇字，咁多年來低價團唔止冇消失，反而成為市場主力，你話班官僚有冇認真把關吖？
正所謂，世不患無法，而患無必行之法。當局打擊零團費做騷咁做，條文形同虛設，不良業界仲唔有恃無恐咩。好似一團一導遊措施咁，目的係避免「刀手」混入旅行團劏客，可惜因為當局執法不力，亂象冇消除不特止，仲不斷惡化，唔止刀手公然劏客，仲多咗影子團友添，佢哋冇事時做媒呃遊客，有事時就充當打手，簡直無法無天。正所謂，「我不殺伯仁，伯仁因我而死。」內地遊客命喪香江，逞兇者固然要受到法律制裁，但港產官僚對旅遊亂象放任自流，又該當何罪吖！
最令人反感嘅係，每次爆出旅遊醜聞，港府唔係反躬自省，設法補鑊，反而大耍官腔，縮骨卸膊。呢，政制及內地事務局局長譚志源話喎，發生遊客被毆斃事件係不幸，零團費現象損害香港嘅「國際大都會」同「好客之都」形象，當局會與內地有關部門研究加強規管咁話。聽住先啦，五年前有位內地遊客因購物爭執被激死，當局夠話關注事件喇，結果咪又係大隻講。港產官僚敷衍塞責，次次出事至補鑊，次次補鑊又虎頭蛇尾，想唔七國咁亂都幾難。
當然喇，要杜絕低價團歪風，當局固然要加強執法，遊客自己亦要提高警覺，最緊要記住便宜莫貪，否則隨時成為羊牯嘅咋，叮！
