政壇：內地反貪成風官宴食豆豉鯪魚

本港政圈中人不時會同內地公務人員聚會，自內地嚴厲反貪同推行節約風後，不但嚴禁公款吃喝玩樂同送禮，連唔少內地宴會都簡樸咗，試過一次簡樸到擺「豆豉鯪魚」上枱，服未？

內地官場不再大魚大肉、鮑參翅肚咁宴客，但有時啲菜式又慳到好嚇人。據講，早前內地有個重要宴會，上枱嘅食物除咗盆「乾爭爭」嘅麵包配牛油外，連湯都無滴。魚呢？有嘅，新鮮魚太奢侈喇，罐頭中嘅極品「豆豉鯪魚」就有，上菜時仲依稀見到罐頭嘅形狀添！

除咗上述兩味別有風味嘅菜式，我哋仲打探到，席上一個海鮮鍋都經歷幾多變遷。話說未奉行節約風之前，海鮮鍋有鮑魚同海參，但近年就變成豬皮、蘿蔔同魚蛋呢啲港式街頭小食。