政壇：「影子團友」考起老行尊
香港旅遊業負面消息不斷，近日又因有內地旅客涉嫌同旅行團導遊及「影子團友」爭拗，最終搞出人命，連國家旅遊局都嚴正關注。○八年退休嘅立法會旅遊界前議員楊孝華（Howard）日前出席活動，佢話「影子團友」係新現象，佢退休嗰時未聽聞過。
楊孝華
Howard慨嘆事件對香港旅業有好大影響，難免予人負面形象，加上業界接二連三受反水貨、「鳩嗚」團等衝擊，嚇到內地遊客唔敢來港。至於近日呢宗糾紛，Howard直言佢多年前仲代表業界時，冇聽過「影子團友」呢樣嘢，當時只係對導遊質素有疑問，家吓就連團友都可能有景轟，政府真係要加強監管。對旅業運作好熟悉嘅佢又話，嚟香港玩多日嘅平價旅行團本身已有問題：「邊有咁大隻蛤乸隨街跳」，可能內地人較少外遊，所以上當。
