政壇：金刀梁留蘇州屎 臨別秋波最頭痕

校委會八月嘅會議通過咗對多名涉及佔中捐款醜聞嘅港大教職員作懲處，戴耀廷話過如果校方做法不合理，唔排除會提出司法覆核。而周二嘅會議，包括戴耀廷、陳文敏、港大民意研究計劃總監鍾庭耀同人文學院前院長蔡量寬都會就早前提出嘅懲處作回應。至於馮敬恩早前披露校委發言，被指違背保密協議及承諾，金刀梁曾表示會研究作出懲處，亦被列入下次會議嘅議程之一。

繼任者誰 推波特首

雖然大部分校委都不滿馮敬恩洩密，但校委會之前並無訂下罰則，對馮有乜懲處？真係好有爭議性，金刀梁卸任前都要頭痕一番。尋日金刀梁接受電台訪問，佢話在任校委會主席六年期間，未曾有任何人向佢施壓，或者影響佢所做嘅決定。對於有傳校委李國章接替佢出任主席，佢話主席係由行政長官委任，尚未知道接任人選，但相信無論邊位接任都會比佢做得好。究竟佢係謙虛定係意興闌珊？大家諗啦。