政壇：樹根講IT拋浪頭
立法會議員成日喺議會噴口水，做少啲功課都出醜，偏偏好多時啲議員自信爆棚冇有怕。好似日前有個委員會討論有關執法部門嘅截聽工作安排，傾到間諜軟件嘅問題，現任資訊科技界議員莫乃光同曾任科技界議員嘅單仲偕，異口同聲質疑一旦裝咗呢類軟件，就好難移除，民建聯嘅「成語專家」鍾樹根竟好勇咁教路，話最少有兩個方法移除間諜軟件，喺兩個業界代表面前「拋浪頭」，真係心口掛個勇字。
以擅長自創成語見稱嘅樹根話，兩個移除間諜軟件嘅方法係直接移除，或預先寫一個可自動卸除軟件嘅程式，佢講到實牙實齒，但莫乃光就質疑，係咪要炸咗部電腦先解決到問題？究竟信邊個，可能要再問專家。
不過，樹根呢個電腦專家原來都經過歲月洗禮，佢一九七六年畢業後第一份工，就係喺中文大學擔任電腦操作員，故了解唔少，佢仲笑笑口話：「我做IT時，佢哋都唔知喺邊」。
講完電腦，樹根再講手機，原來佢早幾晚唔小心將手機跌落廁所，呢個問題估計唔少人試過，點算好？樹根幫到你。
曉用雲端認晒叻
佢話，自己時不時將手機資料上載到雲端，唔驚資料遺失，就算手機救唔番，都可以隨時轉用新機，佢仲叻到連十九年前嘅行事曆都可以喺雲端搵番出嚟。呢招算唔算高招？查實雲端儲存早已廣泛應用，唔係咩新科技啫。
樹根又話，佢依家嘅新手機係國產貨，又教大家內置電池嘅手機最危險，因為就算關機，都唔排除手機運作緊，隨時有被監聽嘅風險喎。
