隨着旅遊業步入寒冬,零售業首當其衝,商舖執吓一間又一間,各區吉舖處處,真係睇見都淒涼。之不過咁,喺寒風凜凜之下,居然仲有業主逆市加租,搞到商戶叫苦連天,問你服未。

係人都知,市場需求主導一切,零售市道唔掂,按道理商舖租金應該下調至係o架。正如一項針對財務、會計等專業人士嘅調查顯示,近四成受訪者預期明年零售店舖價格將下跌一成一至三成。連專業人士都睇淡後市,證明環境有幾咁惡劣啦。

唔係杞人憂天o架,由於零售市道欠佳,近期商舖減租潮持續,銅鑼灣區部分商舖租金跌幅更達四成添。奇怪嘅係,有業主反其道而行,租金不跌反升,甚至寧願丟空舖位,都要企硬加租。以一間位於通菜街嘅水族用品店為例,一千呎舖位月租本來係十三萬元,業主要求加租至十五萬元,店主賺賺埋埋都唔夠交租,無可奈何之下,惟有搵地方搬遷。

咁都未算誇張吖,旺角有間樓上商場餐廳,租約月底到期,月租一下子由七萬元加到十八萬元,加幅達一點六倍,簡直係飛擒大咬,莫講話小本經營嘅商戶難捱,就算係大財團或連鎖店都未必頂得順啦。大家有眼見,喺商戶結業潮之下,旺區出現唔少吉舖,連國際名牌店都要提早撤離。內地官方媒體以「跌跌不休」、「水靜鵝飛」形容香港市道慘淡,唔係亂噏o架。

有店主大吐苦水,最近生意較以前大跌兩成至五成,唔明點解商舖業主仲要逆市加租?有學者估計,業主可能對民生舖位仍然有信心,又或者托價轉售,想用貴租趕客收番間舖啩。一句講晒,有人想賺到盡囉。

即係咁,有啲業主在商言商,想賺到盡一啲都唔出奇,問題係,如果唔理實際情況而瘋狂加租,違反市場規律唔在講,隨時拖垮成個租務市場,令營商環境進一步惡化,最後造成雙輸局面,盞大家都冇運行嘅咋。

話時話,香港近年夠晒亂,中港矛盾愈演愈烈,已經到咗水溝油嘅地步,唔止旅遊及零售業苦苦掙扎,各行各業亦冇啖好食,前景一片暗淡,香港人與其繼續爭吵互鬥,倒不如發揮獅子山精神,一起共度時艱,係咪?

正所謂,留得母雞在,哪怕無雞蛋,一味殺雞取卵,遲早連雞蛋都冇得食吖,叮!