城中鏡:鄉局剩月餅 至今未派完
喺啱啱過去嘅中秋節,新界鄉議局訂購咗三千盒月餅送畀二十七個鄉事委員會嘅委員同職員,但可能鄉事派人多勢眾,難預準派發量,竟至今仲未派完,似足大嘥鬼!但局方計劃本月底將剩餘七十八盒月餅送畀慈善機構,雖然中秋節過咗三周,但月餅未過期o架,對長者真係有心!
侯志強
購月餅一事由鄉議局執委、上水鄉委會主席「侯強」侯志強負責,佢話上月中開執委會時先落實送月餅,一個星期時間就要買三千盒月餅都唔易,所以乜品牌都要大手入貨,仲讚自己話:「我辦事能力係咪好高呢?」講到月餅派唔晒會浪費食物,佢就話二十七鄉各分配一百盒,共二千七百盒,加埋鄉議局職員,齊頭三千盒差唔多喇!
早前傳出鄉事派有意組黨,但部分鄉議局成員身兼其他黨黨員,將出現雙重黨籍問題,侯強認為要代表鄉事派就要退出其他黨派。本身係建仔成員嘅鄉議局副主席張學明就話,退黨嘅事到時先考慮。