城中鏡：AV仁 阿Ann 演爭位鬧劇
訴訟人因唔同理由可能須向法庭繳存或轉入儲存金，司法機構早前提出修訂若干條例完善其運作，負責跟進有關修訂嘅立法會訴訟人儲存金規則小組委員會，尋日舉行首次會議兼選主席。小組只得四名議員，但尋日只有三人出席會議，其中白鴿黨「AV仁」何俊仁同建仔嘅Ann蔣麗芸經過一輪你推我讓後，終由阿Ann當選主席，但阿Ann當選後又忽然反問AV仁係咪好想做主席，真係鬧劇一場。
蔣麗芸終當選立會訴訟人儲存金規則小組主席。
呢個小組合共有四名成員，分別係阿Ann、AV仁、工黨Cyd何秀蘭同法律界議員郭榮鏗，但只得前三者出席會議。阿Cyd首先提名AV仁做主席，但阿Ann唔肯和議，又反問係咪可以自己提名自己，AV仁回應話可以。但當阿Ann提名自己時，阿Cyd又唔肯和議支持阿Ann，事關阿Cyd認為AV仁具專業背景，做主席較好。
不過，阿Ann反指AV仁如果做委員可以負責提更多問題，最終擾攘一輪後，阿Ann得到AV仁和議同投票支持，加埋阿Ann自己嗰票當選主席。
