城中鏡：「樂」無邊界
尋日香港理工大學向六名人士頒授大學院士榮銜，表揚佢哋對理大同社會嘅貢獻。獲頒榮銜嘅包括著名小提琴家姚珏、機場管理局前行政總監林中麟、工程師劉志宏、和富慈善基金主席李宗德、論壇組織「三十會」召集人李律仁同香港中華廠商聯合會前會長施榮懷。姚珏話今次係第一次獲頒院士，望可繼續喺香港推廣音樂無分邊界嘅文化。
姚珏首次獲頒大學院士榮銜。
李宗德（右二）獲姐姐（中）、女兒李美羚（右一）、李美辰及其丈夫蔡德昇（左二及一）捧場。
施榮懷（中）獲頒院士榮銜，獲爸爸施子清（左二）同幾兄弟到場打氣。
劉志宏熟焊接包冇鉛水
現場見到唔少理大學生去捧姚珏場，講起香港好多學生學樂器，但鮮有以此為職業，姚珏就認為音樂以唔同形式融入生活，又指香港有好多玩音樂好出色嘅學生，都係嚟自唔同學系但對音樂充滿熱誠，即使佢哋將來唔係以此為職業都冇問題，當係一種興趣都足以為生活同周圍嘅人帶嚟好多正能量。
劉志宏透露佢同理大淵源深，事關佢同爸爸都係理大前身香港工業專門學院嘅校友，弟弟就係理工學院畢業生，太太就曾喺理大擔任副教授。曾做過黃大仙區議員嘅佢話，過往喺地區觀察唔同設計實用性，再由下而上提出改善，又笑言自己熟悉焊接喉管同紮鐵工作，佢做嘅喉管唔會有鉛水喎。
李宗德喺九七年成立「和富慈善基金」，年前資助理大學生參加內地體驗計劃，又推動全人教育，尋日獲姐姐同兩個女捧場。施榮懷就獲多位家人同好友到場支持，佢喺台上致答謝詞時話，呢個院士名銜應該係屬於廠商會嘅。
