政壇：搞搞政：梁家難兄難弟 港大公院拆彈
加薪風波愈鬧愈大，公共醫療醫生協會發起今日喺伊利沙伯醫院靜坐抗議，算係近年公院醫生最大宗示威行動。有醫療界中人就為今次風波把脈，認為事件其中一個元兇係醫院管理局主席梁智仁。梁智仁嘅胞兄、港大校委會主席梁智鴻已因港大委任副校長風波一事中箭，如今又輪到梁智仁面對醫生怒氣大爆發，真係難兄難弟嘞！
政府喺兩年前委任骨科醫生梁智仁做醫管局主席，希望更能掌握前線醫生嘅脈搏，加上佢曾任公開大學校長，拆彈能力唔錯。但今次班公院醫生嚟一次大爆發，都係由食物及衞生局出面回應。有工會中人話，其實佢哋一向先同醫管局高層人員商討，「傾唔掂」先向政策局「講數」，行到最後一步先至「反枱」。
但喺今次事件中，據聞梁智仁無見過工會，只派行政總裁梁栢賢或聯網服務總監張偉麟見面，可想而知呢班高層有幾「接地氣」。有人笑稱，梁智仁對公院醫生加薪風波歎慢板，唔知係咪學咗其胞兄梁智鴻嘅慢條斯理同滋油淡定作風。
「加薪應問番醫管局」
另一方面，工會將矛頭指向政府，批評減薪就跟政府，加薪就無跟，部分人仲要求醫管局跟隨公務員薪級表。但有政府中人就大呻，指今次額外加薪係因為公務員事務局六年一度嘅「薪酬水平調查」，由於醫管局已獨立於政府，所以並唔適用，如果政府屈服支付額外嘅薪金開支，其他資助機構將有樣學樣，反問「不如將醫管局變番衞生署咪得囉，使乜你有獨立財政？」
該政府中人又稱，○九年減薪係醫管局因應政府高層減薪嘅自願決定，兩者性質唔同。醫管局盈餘好多，加薪理應無問題，即使資金不足，大可向政府提出追加撥款，但事實上醫管局至今仲未將加薪涉款嘅預算提交政府，「無理由乜都唔做就攤大手板問政府攞錢！」梁智仁面對工會同政府夾擊，最後能否成功拆彈呢？
