政壇：以色列數碼保安軍用級

尋日嘅以色列Fintech（金融科技）論壇，場內十間以色列公司，有七間提供數碼保安、網上保安服務，香港買家都話「以色列啲保安真係堅」。

喺論壇參展、研發藍芽通訊嘅Wisesec代表話，公司有二十五個人，除咗佢，其餘二十四位都係工程師，大部分之前都係從軍嘅，好處當然係大家一Team人做事嚴謹，唔好處係CEO之前都係從軍嘅，有乜嘢事要討論嘅話……老細係軍人出身，聽到個心都離一離。

其實以色列人口唔多，得八百幾萬，由於所在地長年烽煙四起，軍事競賽唔少得，喺政府大力支持下，除咗飛機大炮，過去十年高科技產業經濟角色舉足輕重，當地軟件開發同通訊都係世界頂尖，經常被譽為中東硅谷。