男人最怕點嘅女人?聽講係叻嗰啲女人。唔單止《經濟學季刊》咁講過,連另一份下個月會全面發表嘅研究亦一樣咁講。

《經濟學季刊》之前登過篇研究,發現大部分男士喺Speed Dating(極速約會)時,都抗拒啲叻過自己嘅女人,理由係男士怕被高質女士拒絕。個研究同經濟有乜關係?原來拍拖識仔識女既係社會行為,但另一角度嚟睇亦係市場行為,事關一樣講供求,兼量化得到。

另一個嚟緊下月會全面發表嘅研究,結果又係同《經濟學季刊》之前嗰個差唔多。呢次個實驗分成兩部分。上半部齋畀受訪男士睇啲女士嘅數學同英文成績,啲男人都覺得女人愈叻愈吸引;到實驗下半部,先畀啲男士做「智能測試」,再畀佢哋埋身見面,只要一話呢位女士測試叻過佢,男人就即刻卻步。

結論係,男人口講話鍾意同叻過自己嘅女人拍拖,到真正埋身實情係怕怕咪搞,理由聽講係怕自尊受威脅。嗱!先旨聲明,以上講緊嘅係凡人,非凡人唔計。

第一手消息請下載on.cc東網iPhone/iPad/Android/Windows Phone Apps