話說立法會扶貧小組委員會尋日下晝開會，聽取團體代表同個別人士嘅意見。由於團體數目多達九十六個，會議料需時六小時，未知係咪到場發表意見嘅團體代表同人士嘅意見同話題重覆，不僅勞工及福利局副局長蕭偉強喺會議期間神情呆滯，就連主打基層民生路線嘅多名泛民主派議員都似乎聽到昏昏欲睡，個別議員甚至瞓着覺，莫非想搵周公幫手扶貧？

李卓人（左圖起）、馮檢基開會期間似瞓着咗；蕭偉強就顯得神情呆滯。

喺現場所見，白鴿黨「AV仁」何俊仁、工黨李卓人同民協KK馮檢基都頻頻「釣魚」，KK用手指頂住眉心，唔知係咪想自行按摩醒吓神，抑或係驚瞓着覺「釣魚」畀人發現。至於李卓人仲一度閉目兼「頭耷耷」，個樣似瞓着咗。雖然會議漫長，但團體代表一場嚟到立法會表達意見，作為官員同議員就唔應該闔眼瞓，否則好唔尊重，團體代表豈不是對空氣表達意見？

第一手消息請下載on.cc東網iPhone/iPad/Android/Windows Phone Apps