政壇：德銀「肥手指」 無端贈客468億
德意志銀行呢排認真當黑，啱啱先公布大規模重組同改革管理層，話要重振盈利同強化管治，點知轉頭就爆咗一單不幸事件，錯喺初級交易員隻「肥手指」度，令德銀無端送走咗四百六十八億元。
呢單不幸，發生喺今年六月嘅某一日，主角係德銀倫敦外匯部一名初級交易員。一般嚟講，銀行處理對沖基金交易時，會等全日交易結束後，經加加減減再將淨額一次過支付畀對方，但故事主角落盤時，竟然唔用「淨值」，搞錯用咗「總額」，單交易就係咁多咗好多個零，德銀結果大拿拿送咗六十億美元（約四百六十八億港元）畀一家美國對沖基金客戶。
好彩追得番，人哋第二日原銀奉還，否則德銀業績仲難睇；但都揭露咗德銀嘅內部問題，醜爆。
呢類烏龍，洋人稱為「Fat-Finger（肥手指）」，指鍵盤粒掣太細，手指太肥，唔小心撳錯掣咁解。「肥手指」錯盤喺業界算常見，但「肥」到成四百六十八億元嘅，就罕見嘞！
有人質疑，德銀呢次點解冇晒佢哋個「四眼原則」、即「Four Eyes Principle」也，意指任何交易都要經「四隻眼」睇過，畀多個人覆核。據聞咁啱主角個阿頭嗰日放咗假，唔知係咪無王管，就搞成咁。
點都好，德銀已因涉嫌違反伊朗交易禁令、操縱倫敦銀行同業拆息同外匯市場、喺俄羅斯洗黑錢等，畀監管機構咬住唔放，希望班細嘅醒定啲啦！
