政壇：駐外辦亂世逢生

立法會工商事務委員會尋日開會，邀請一班長居同長駐海外嘅官員匯報，報告一如以往搞吓電影節推廣香港文化、協助外資來港開設辦事處等。工業界議員林大輝就問，政治同經濟掛鈎，而過去一年香港發生為期七十九日嘅佔領行動同高票否決政改方案，到底當局點樣向海外政界、工商界人士解釋呢？

香港駐美國總經濟貿易專員梁卓文就話，當地人只能夠透過傳媒理解，但報道又唔夠全面，報道佔領行動時又選擇精要畫面，會令到外國人以為香港好亂。佢仲話要深入淺出講解政改問題，傳達香港無因為佔領行動而搞到經濟差嘅訊息。駐歐盟專員林雪麗亦發表相近言論，佢仲話要連《基本法》、人大決定講起，仲引述歐盟五月發表嘅報告，指一國兩制喺香港運作良好添！

商界議員質疑成效

不過，大輝批評用《基本法》同人大作解釋成效好一般，質疑當地工商界唔會收貨。梁卓文就話已經盡量解釋，但的確難掌握成效如何。不過，當地人會觀察到香港喺佔領行動後政局仍然穩定，睇唔到佢哋對香港睇法會有根本改變。

另外，商界議員林健鋒亦擔心本土派嘅行動嚇怕國內同胞，駐京辦主任傅小慧話會同內地朋友解釋，行動非廣大市民認同，而商界亦反感。佢仲話過去一年曾舉辦活動，吸引內地民眾參與，透過當地傳媒宣傳香港係好客城市。睇嚟佔領行動後期，駐外辦事處人員嘅工作相當充實喎。