公院事故鑊鑊甘 稚子無辜也遭殃

唔好以為呢個係笑話，呢，一個三歲男童就係受害者嘞。因為發燒、肚痛同嘔吐被送入瑪麗醫院，醫生診斷係腸胃炎，處方止瀉同止嘔藥打發男童出院。點知啲藥食極都唔好，持續不斷肚痛，第二日去睇私家醫生，再轉介去急症室，先至被診斷為急性盲腸炎，再拖落去，分分鐘小病變大病，問你怕未。

斷錯症嘅後果真係好嚴重o架，最慘累到男童腸道灌膿，錯過做手術最好嘅時機，只能夠插喉放膿以及注射抗生素治療，無端端要喺喉嚨、手部、腋下以及背部插滿喉，打側身瞓足三個星期病床，令人不禁慨嘆一聲，稚子何辜呢！

庸醫藥石亂投耽誤治病，分明係靠害。點知瑪麗醫院唔認衰，死撐話男童入院初期病徵係腸胃炎，後尾接受超聲波檢查至確診為急性盲腸炎，認為醫生無誤診及醫療疏忽。有冇搞錯呀，盲腸炎同腸胃炎不分，診症馬馬虎虎，唔止兒戲，直頭攞人命較飛呀。

話時話，盲腸炎同腸胃炎，雖然都係「炎」，不過差之毫釐，謬之千里，點可能撈亂嘅啫。係人都知，急性盲腸炎需及早開刀醫治，雖然唔係大手術，但絕對唔可以輕視，一旦延誤開刀時機，短短幾粒鐘有機會惡化，可能破裂導致腹膜炎，後果可大可小，唔係誇張，情況嚴重甚至會致命添。

匪夷所思嘅係，中學生都知嘅基本常識，受過專業培訓嘅杏林精英居然矇查查，有冇更荒謬啲呀。不過咁，近年醫護人員嘅水準每況愈下，何止器官不分，左右不分，上下不分，根本不足為奇咯。呢，曾經有公院病人右胸腔積水要做穿刺，點知醫療紀錄寫錯左胸腔，結果手術後翻睇X光片至知出錯。最陰功係病人，無情白事捱多刀，慘上加慘，唔怪得有人話，家陣幫襯公立醫院要攞命博咯。

講到底，醫療事故無日無之，醫管局固然責無旁貸，醫護人員亦要好好反省，唔好一味向錢看，郁啲搞靜坐行動爭取薪酬福利。正所謂醫者父母心，着起白袍有崇高嘅使命，唔止係一份工咁簡單。計太一叮話齋，醫護人員唔攞個心出嚟治理病人，點對得住白衣天使嘅榮譽吖，叮！