城中鏡：張智威渡完海論股海

日前舉行嘅維港渡海泳，信誠證券聯席董事Alvin張智威都有參加，仲成功游畢全程。今次佢首次參與，就親身感受到乜叫驚濤駭浪。Alvin仲三句不離本行，話大海如同股市，每每會有大風大浪，但投資者揀中優質股，就自然可以乘風破浪咁話。

張智威首次參加維港渡海泳，即成功游畢全程。

Alvin上年維港泳都有報名，但太多人參加，佢過咗水試都抽唔中，變咗今年先第一次參與。佢話財金人壓力大，唔多唔少都要有啲興趣同運動減吓壓，佢就鍾意攝影、行山同游水咁，仲幾乎隔日就去泳池游。之不過，今次游維港可謂係另一種挑戰，因要應付較急水流，同喺泳池游好唔同。