城中鏡：莫乃光倒米
其實教育界推動電子教科書教學已有一段時間，依賴實體教科書嘅比例逐步減少，但始終部分人都係鍾意拎住本書睇嘅感覺，好似香港家庭教育學院總監Dick狄志遠就表明老一派都係比較鍾意拎本書上手嘅感覺，又話自己去旅行，習慣帶一兩本比較薄嘅書本去睇；至於資訊科技界議員Charles莫乃光亦話鍾意睇實體書多啲，仲話書架上有一排排實體書先叫型，但唔知正推廣電子書嘅業界，會唔會覺得有人嘅言論「倒米」呢？
莫乃光指書架上有一排排書，予人感覺好有墨水。
狄志遠話老一派都比較鍾意拎本書上手嘅感覺。
馬逢國（左）話盡量使用平板電腦睇文件，旁為簡永基。
早前有團體舉辦校本電子教科書體驗計劃啟用典禮，阿Dick、Charles等人獲邀任主禮嘉賓，電子教科書協會會長簡永基為活動致歡迎詞。講開近年電子書愈出愈多，阿Dick等人都異口同聲話，用平板電腦睇文件同文章比較多，但佢哋都係鍾意睇番一本本嘅實體書，覺得拎起本書嘅感覺會享受啲喎。阿Dick笑言，老一派都係比較鍾意拎上手嘅感覺，又話佢個仔就會用平板電腦，感覺型啲喎。
「睇實體書似有墨水」
Charles認為書架上有一排排實體書先叫型，可以畀人感覺好似好有墨水，又話雖則睇實體書好似唔係咁環保，但都有好處，就係可以用書籤記錄低自己睇到邊，方便自己一拎上手就追到進度。
同場嘅立法會體文界議員馬逢國自言鍾意睇實體書，覺得拎上手會享受啲，但同時承認如果開會文件印晒出嚟，唔係咁環保，所以都會盡量用平板電腦睇文件同埋資料。佢又話由於目前仲係學緊用平板電腦睇文件，因此當選內務委員會副主席後，仍然要求同時獲得電子版同印刷版嘅文件，唔知馬逢國要適應幾耐，先可以完全「無紙化」睇文件呢？
