法拉利今個星期三喺紐交所掛牌上市，有貨梗係「揸」住先，若然股價爆升，到時揸法拉利就真係不是夢喇！諗到呢度，係咪覺得有必要諗吓架超跑要乜嘢色先。咪睇小顏色，除咗反映車主性格，仲會影響個二手價。揀錯色，超跑即刻變錢七。

以為超跑就一定係麥拿侖橙或者法拉利紅？唔係噃，實情最受觀迎係白、銀同灰。尤其係銀色，三成幾嘅豪華車都係銀色，其次三成就係白（唔理係雪白、米白、定其他各種白）。無論閣下幾鍾意黑色，Sorry，舊年賣出嘅豪華車中，只得百分之八點五係黑色；係都要揀黑？咁睇你有幾想與別不同，又有幾唔介意人哋唔覺你架係超跑囉！

揀大紅同鮮黃嘅，顯示車主後生夠激又飆得；揀綠同湖水綠，就代表係個極重視高性能；揀銀色同白色就冷靜兼豪。邊個講？係Cadillac嘅專家講(O架)！

仲有就係架車乜嘢色直接影響二手價。唔志在嘅，咪揀啡色囉，個價即貶幾千到幾萬蚊；志在嘅，就唔該揀啲五年後都興嘅色。係(O架)，車嘅顏色同時裝一樣，有Trend(O架)，好似湖水綠喺九十年代潮過，想永遠興就唔該白色吖。若果想連架車嘅內籠都贏埋，咁就唔該聽專家話，內籠要揀啲畀人感覺好似身處屋企嘅顏色。

第一手消息請下載on.cc東網iPhone/iPad/Android/Windows Phone Apps