政壇：喬布斯手嵌電腦值600萬
一部蘋果電腦值幾錢？分分鐘可以去到六百萬港元！講嘅係第一代蘋果電腦，即係一九七六年出世，由蘋果前教主喬布斯同佢當年拍檔沃茲尼亞克親手喺屋企車房嵌出嚟嗰批Apple-1，其中一部依家喺網上拍賣緊。
呢套就係傳說中嘅Apple-1，身價估計貴過層樓。（互聯網圖片）
部機仲連埋原裝Operation Manual（說明書）連三餅卡式帶。以前Boot機要用Floppy（磁碟），未有Floppy嘅年代就係用卡式帶嘅。Apple 1嗰三餅卡式帶上面貼咗乜嘢、Label有粒乜嘢字母，佳士得都講得清清楚楚。仲有，本Operation Manual仲係偉恩寫嘅，偉恩就係設計第一代蘋果Logo嗰位。
部機仲識唔識郁？唔知呢，事關對上嗰次開機係二○○五年，即係十年前。點解咁矜貴？皆因Apple-1當年只出過二百部咁大把，當今世上只剩得五十部，當中好多都係由博物館收藏，私人收藏無幾多。
