政壇：星爺借payWave 撐創科局
感應式信用卡外洩資料風波，觸及新一波換卡潮，身為立法會金融界議員嘅「星爺」吳亮星突然舉行記者會，趁機反駁資訊科技界議員Charles莫乃光，早前有關批評銀行界於此事後知後覺等說法，形容對方為「習慣性反對派」，星爺其後再藉機撐應盡快成立創新及科技局。
吳亮星反駁莫乃光早前批評銀行後知後覺嘅言論。
星爺喺記者會首度開腔談及今次風波，力撐金管局、銀行同外判供應商都有跟進工作，當問及涉事銀行喺今次風波表現，星爺以自己係中國銀行（香港）信託董事長為由，不評論個別銀行嘅做法。
其後佢主動提及創科局，指各行業科技日新月異，就好似payWave信用卡般，其實都是應客戶需要，其後又多次強調從民生角度，應該盡快成立創科局。
另一方面，星爺又點名批評Charles，一方面反駁對方稱銀行後知後覺，只查找責任等言論，促請包括對方在內嘅資訊科技人士應專注科學，「銀行嘢就留番畀銀行處理，唔應該政治化」。
