政壇：怪醫等收工 懶理加薪風波
香港公共醫療醫生協會發動全港公立醫院醫生，聽日重陽節假期當日，雲集伊利沙伯醫院靜坐，抗議醫院管理局未有跟隨政府公務員調高公院醫生薪酬。今次抗爭行動至今已獲得逾一千名公院醫生透過互聯網響應，但有醫學界中人發現，外號「怪醫」嘅現任立法會醫學界議員梁家騮近日好似人間蒸發咗咁，甚少就今次事件發聲，進一步印證佢已下定決心「等收工」，明年九月唔會再角逐連任立會議員。
梁家騮
怪醫曾經做過公共醫療醫生協會會長，仲曾經自掏腰包請律師為公院醫生同事爭取權益，但怪醫喺一○年正式離開公共醫療體系，改為自己開診所成為私家醫生，對公院醫生加薪問題唔似像過往咁「貼身」同「貼心」。
更重要嘅係，怪醫喺一一年結婚告別「鑽石王老五」生涯，喺短短三年內生咗三個仔女，自此被外界認為只顧「搵真銀」同「湊仔」，因此當一眾疑似立會醫學界參選人，包括醫學會嘅蔡堅、西醫工會嘅楊超發，同埋港大感染及傳染病中心總監何栢良，先後就今次加薪事件表態時，「官到無求膽自大」嘅怪醫疑大墮後，直至尋日晚上回覆聲稱，自己知悉事件後一直同協會密切溝通，但同時自爆明日因私事離港，將唔會參加靜坐行動，預告第時有行動必定會參與喎。
