政壇：陳岳鵬 首單拖赴會甩轆

卿姐發言時多次追問Ronald等官員，過去有幾多候選人可取得申報選舉開支嘅一半資助，政制局副秘書長梁松泰回應話近九成候選人所得資助，佔申報選舉開支近五成。

其後卿姐質疑當局係咪有心幫助候選人，過去極少例子甚至從來未做到，可獲得佔申報選舉開支五成或以上，Ronald重申當局嘅資助計劃原則，又話候選人理論上有機會獲得所有選舉開支資助。

卿姐聞言再反駁，當局資助計劃有三個原則，往往選取三者中金額最低嘅一個，批評Ronald「唔好堅離地」，要實際睇睇相關數據，更指「你估我未選過舉，我選舉嗰時你都唔知喺邊度」。

駁番一舊雲攞尾彩

另一方面，卿姐嘅黨友「一舊雲」黃碧雲發言時，以九龍西地方直選增至六席為例，預料該區最後一席當選者或只需三萬票，按每票十四元資助推算，預料只可取回四十二萬元，根本未能取得目前建議九西選舉開支限額約一百八十二萬元嘅一半，即合共九十一萬元，擔心會對財力較遜嘅候選人造成不公平競爭。

一舊雲又話Ronald本身係「史丹福大學嘅數學（系）」，應就此計算一下，其後又突然建議不如把每票資助增至二十元，或降低選舉開支限額，令眾候選人「無錢鬥無錢」，Ronald今次終於直接反駁指有關比喻唔合適，強調唔應該以此作直接比較喎。